– Сам па сабе выбар буйной еўрапейскай фундацыі ў якасці аператара сродкаў абумоўлены тым, што праект патрабуе выканання вялікай колькасці складаных і ў той жа час празрыстых працэдураў. Дацкі інстытут культуры ўжо мае досвед размеркавання вялікіх сродкаў, у прыватнасці, апераваў грашыма Дацкай дэмакратычнай фундацыі.
У супрацы з дацкімі калегамі распрацоўваем усе інструкцыі, палажэнні, формы, неабходныя для правядзення конкурсаў у межах праекту ArtPower Belarus. Гэта адмысловыя дакументы, якія ствараюцца менавіта для нашай праграмы. Ёсць спецыфіка надання грантаў менавіта дзеячам культуры, тут мы павінны быць пільнымі, уважлівымі ды браць пад улік яшчэ і творчы кампанент.
Сама праца будзе адбывацца так. На сайце будзем змяшчаць публічныя палажэнні конкурсаў, у якіх будзе дакладна прапісана, куды, як і ў якой форме падаваць заўяку на грант. Затым кожны конкурсны праект будзе ацэньвацца не менш як двума незалежнымі экспертамі (не экспертамі Рады культуры!), якія не павінны быць звязаныя з тымі, хто падае заяўкі.
Эксперты падаюць свае ацэнкі пісьмова, выстаўляючы праекту балы ў адпаведнасці з азначанымі крытэрамі. Тут жа яны будуць дадаваць каментары, чаму быў выстаўлены той ці іншы бал. Аўтары праектаў пазней змогуць пабачыць гэтыя дакументы, каб зразумець, што было добра ці што было не так у пададзеным праекце і, магчыма, дапрацаваць яго для наступнага кола.
Наступны этап конкурсу – разгляд праекту на адборачным камітэце. Ён складаецца з прадстаўнікоў партнёраў праекту і незалежных экспертаў, у тым ліку міжнародных. Фінальны вынік будзе залежаць і ад ацэнкі экспертаў, і ад меркавання адборачнай камісіі.