Беларуская Рада Культуры

Чытаць у pdf

Афіцыйны лагатып

Юрыдычная даведка

Зарэгістраваная з кастрычніка 2020 года на тэрыторыі ЕЗ (у Эстоніі пад назваю MTÜ Valgevene Kultuuri Assotsiatsioon) некамерцыйная дабрачынная арганізацыя, з траўня 2023-га мае праваабарончы статус.

У Беларусі на рашэнне Міністэрства ўнутраных справаў прызнаная “экстрэмісцкім фармаваннем”, на рашэнне Партызанскага суда Мінску ўсе старонкі і суполкі ў сетках, матэрыялы ды ініцыятывы Беларускай Рады культуры прызнаныя “экстрэмісцкімі матэрыяламі”, “экстрэмісцкім” таксама прызнаны адзін з нашых тэлеграм-каналаў, прысвечаных кампаніі #BelarusWithUkraine.

Telegram
https://t.me/radakultury
https://t.me/by_culture

Facebook
https://www.facebook.com/bcsfbel

Instagram
https://www.instagram.com/by_culture/

Twitter
@radakultury

YouTube
https://youtube.com/@byculture

Кантакты для сувязі:
resource@byculture.org
Віртуальны Рэсурсны цэнтр

press@byculture.org
Запыты ад прэсы, каментары, эксперты

info@byculture.org
Астатнія пытанні

Місія

Беларуская Рада культуры як грамадская інстытуцыя яднае намаганні дзеля адбудовы жыццяздольнай інфраструктуры новай, вольнай беларускай культуры.

У сферу інтарэсаў найперш уваходзяць:
• культурніцкая палітыка;
• аналітыка культуры і даследаванні культурніцкага поля;
• фандрэйзінг на культуру;
• адвакатаванне і лабіяванне культуры;
• адукацыя ў сферы культурніцкага менеджменту;
• лабіяванне і PR культуры.

Асобная лінія дзейнасці – кансультаванне ў пытаннях персанальнай дапамогі.

Стратэгічныя кірункі працы, або што мы робім

Рэсурсны цэнтр

Захоўвае і развівае творчы патэнцыял нацыі ды назапашвае рэсурсы для развіцця беларускай культуры і адбудовы жывой крэатыўнай камунікацыйнай прасторы.

Інстытут прамоцыі, або культурніцкая дыпламатыя

Адвакатуе і лабіюе культуру ва ўзаемадзеянні з палітычнымі цэнтрамі, міжнароднымі структурамі і грамадзянскаю супольнасцю. Ладзіць глабальную прамоцыю беларускай культуры, залучаючы яе ў сусветны кантэкст.

Сойм, або кааліцыя культурніцкіх ініцыятываў

Яднае культурніцкія супольнасці для вызначэння культурніцкай палітыкі і праектавання рэформаў.

Чым мы не займаемся:

• арганізацыяй івэнтаў;
• пошукам вакансіяў і працаўладкаваннем;
• контрпрапагандаю;
• арэндаю, набыццём інструментаў і абсталявання для імпрэзаў.

Але! У межах Рэсурснага цэнтру мы адкрылі фізічную прастору ў Вільні – Гасцёўню, дзе вы можаце зарганізаваць сваю імпрэзу, а таксама мы можам прапанаваць у бескаштоўную арэнду гукавое і светлавое абсталяванне.

Што мы ўжо зрабілі (абранае):

Рэсурсны цэнтр

• У сферы аналітыкі:

– запусцілі працу аналітычнай групы, штоквартал выдаём аналітычныя матэрыялы пра стан культуры ў розных яе сферах;
– падрыхтавалі Аналіз мадэляў культурніцкай палітыкі і механізмаў фінансавання сферы культуры ў краінах Усходняй Еўропы.

• У сферы прыцягнення рэсурсаў і падвышэння патэнцыялу культурніцкай сферы:

– запусцілі працу фізічнай пляцоўкі Рэсурснага цэнтру – Гасцёўню, дзе можна ладзіць сустрэчы ды імпрэзы;
– запусцілі пры падтрыманні Еўразвязу праграму дапамогі беларускай культуры Art Power бюджэтам 2 мільёны еўраў;
– правялі хакатон "Культурны код" і запусцілі нэтўоркінг-пляцоўку для беларускіх дзеячаў культуры ды праграмістаў;
– запусцілі праект "Магістраты", у межах якога можна далучыцца да супольнасці, якая падтрымлівае важны для яе праект.

• У сферы дапамогі рэпрэсаваным артыстам і дзеячам культуры:

– персанальна падтрымалі больш за 750 дзеячаў культуры (фінансавая, візавая, юрыдычная, медычная, псіхалагічная дапамога, дапамога з працаўладкаваннем ды інш.), падтрымалі рэалізацыю больш як 150 творчых праектаў (2020–2023);
– фінансава ды інфармацыйна падтрымалі арганізацыю:
– больш як 30 канцэртаў салідарнасці;
– 17 трансляцыяў тэатральных пастановак;
– правялі 20 аўкцыёнаў салідарнасці з мэтаю збору сродкаў рэпрэсаваным беларускім творцам;
– ажыццявілі медыяпраект з сотняю матэрыялаў і дзясяткам ролікаў "Артысты Перамогі".

Інстытут прамоцыі, або культурніцкая дыпламатыя

У сферы прамоцыі беларускай культуры ініцыявалі і правялі шэраг міжнародных кампаніяў ды супольных акцыяў беларусаў свету, напрыклад:

– адзначэнне Дня беларускай культуры (7 ліпеня) і правядзенне Дзён/Тыдня беларускай культуры вакол гэтай даты (з 2021);
– узялі адказнасць за рыхтаванне міжнароднай акцыі "Ноч паэтаў" памяці расстраляных у 1937-м беларускіх пісьменнікаў 29–30 кастрычніка (з 2021);
– правялі медыякампанію #BelarusWithUkraine з сумарным ахопам 3,2 мільёна карыстальнікаў украінскіх медыяў і больш за 4 мільёны сумарных праглядаў ролікаў у TikTok.

Беларуская Рада культуры бярэ актыўны ўдзел у міжнародных канферэнцыях і дыскусіях, ладзіць брыфінгі для донарскіх арганізацыяў, кансультуе партнёраў у іншых краінах (у прыватнасці, пры ўдзеле БРК была пачатая праца для заснавання Фонду культуры Малдовы).

Задзеяная ў працы кансультатыўнай групы Еўракамісіі аб Беларусі, у працы Форуму грамадзянскай супольнасці краінаў "Усходняга партнёрства", мае трывалыя кантакты з дыпламатычнымі прадстаўніцтвамі шэрагу краінаў ЕЗ і ЗША.

Сойм, або кааліцыя культурніцкіх ініцыятываў

Створаны маніфест "Больш як культура", які выказвае нашае бачанне шляхоў развіцця беларускай культуры сёння. Стаўся асноваю для распрацоўвання дарожнай мапы падтрымання культуры.

Супольна з іншымі культурніцкімі ініцыятывамі (Беларускі ПЭН, Інстытут кнігі, Кінаакадэмія, ініцыятыўная група Інстытуту нацыянальнай памяці) і дзеячамі культуры распрацавалі дарожную мапу развіцця культуры і прэзентавалі яе ў Бруселі на SOM 11 траўня 2023 года. Маем станоўчыя водгукі ад DG NEAR, рыхтуем наступныя крокі для перамоваў з ЕК і краінамі – чальцамі ЕЗ.

Спрыяем стварэнню сетак і кааліцыяў дзеячаў культуры. Пры нашай дапамозе былі створаныя два прафесійныя аб’яднанні, некалькі суполак атрымалі інстытуцыйную фінансавую дапамогу.

Што мы збіраемся зрабіць далей (топ прыярытэтных ідэяў)

Рэсурсны цэнтр

Працягваем далейшую працу для прыцягнення рэсурсаў на падтрыманне і развіццё беларускай культуры:

– супрацоўнічаем у справе дарожнай мапы развіцця і падтрымання культуры з ЕЗ;
– распрацоўваем канцэпцыі краінавага патранату сфераў культуры;
– працуем над стварэннем клубу мецэнатаў беларускай культуры;
– працягваем працу ў кірунку магістратаў.

Для павышэння кампетэнцыяў культурніцкіх менеджараў:

– супольна з партнёрамі з Беларусі ды Швецыі плануем запусціць у 2024 годзе пілотны адукацыйны курс "Школа арт-менеджменту";
– плануем развіццё медыяплатформы, што апавядае пра рэсурсныя, адукацыйныя і прафесійныя магчымасці для беларускіх дзеячаў культуры.

Інстытут прамоцыі, або культурніцкая дыпламатыя

Развіццё кірунку культурніцкай дыпламатыі, праца для стварэння Інстытуту прамоцыі Беларусі;

Правядзенне глабальных міжнародных акцыяў "Ноч паэтаў" (вакол даты 29 кастрычніка) і Дзён культуры (вакол даты 7 ліпеня);

Кампанія для абароны аўтарскіх правоў у Беларусі, выключэнне прадстаўнікоў рэжыму з Сусветнай арганізацыі абароны інтэлектуальнай уласнасці.

Сойм, або кааліцыя культурніцкіх ініцыятываў

У межах фармавання і рэалізацыі актуальнай для беларусаў культурніцкай палітыкі мы
плануем:

працягнуць працу ў стварэнні Сойму беларускай культуры ды спрыяць стварэнню сетак і кааліцыяў дзеячаў культуры: увосень 2023-га плануем першую канферэнцыю, якая пакладзе пачатак стварэнню Кааліцыі культурніцкіх ініцыятываў;

у супрацы з партнёрамі з пяці краінаў рэгіёну "Усходняга партнёрства" працуем у пытаннях культурніцкай дэкаланізацыі рэгіёну і рыхтуем два ўоркшопы на гэтую тэму; у практычнай плоскасці плануем працягнуць кампанію адвакатавання Беларусі #art_born_Belarus з вяртаннем беларускай прапіскі славутым дзеячам культуры;

працяг працы для нэтўоркінгу культурніцкіх дзеячаў і прадстаўнікоў IT-індустрыі (праект "Культурны код");

працягнуць і ўдасканаліць працу для маніторынгу і ўпарадкавання інфармацыі пра рэпрэсіі супраць дзеячаў культуры, ладзіць кампаніі салідарнасці з палітычнымі вязнямі, звязанымі з культураю.