Праграма ArtPower Belarus працягвае прыём заявак на грантавы конкурс па Трэку 3. Праекты ў асаблівых абставінах. Ён прызначаны для беларускіх дзеячаў культуры і ініцыятыў, якія сутыкнуліся са складанымі або непрадбачанымі жыццёвымі і прафесійнымі абставінамі і маюць патрэбу ў падтрымцы для рэалізацыі культурніцкага праекта.
Падача заявак на Трэк 3 адкрытая на сталай аснове. Памер гранта складае ад 1 000 да 5 000 еўра, а ў выключных выпадках — да 10 000 еўра. Рэалізацыя праекта павінна завяршыцца не пазней за 31 жніўня 2027 года.
Хто можа падавацца?
На конкурс праектаў па Трэку 3 могуць падавацца:
- рэпрэсаваныя творцы пры пацвярджэнні рэпрэсій не пазней чым за год да падачы заяўкі;
- аўтары, якія страцілі працаздольнасць на працягу апошніх 12 месяцаў;
- вымушаныя эмігранты на працягу першага года пасля выезду;
- аўтары і ініцыятывы, якія страцілі фінансаванне не пазней чым за тры месяцы да падачы;
- праекты і мабільнасці, якія немагчыма перанесці без істотнай шкоды;
- заяўнікі, якія апынуліся ў іншых выключных абставінах і могуць пацвердзіць іх дакументальна.
Якую падтрымку можна атрымаць?
Фінансаванне можа быць выкарыстана для рэалізацыі невялікіх культурніцкіх праектаў, тэрміновых дзеянняў і мабільнасцяў, напрыклад, для ўдзелу ў міжнародных падзеях, рэзідэнцыях, адукацыйных праграмах або даследаваннях. Таксама падтрымка можа дапамагчы завяршыць праект, рэалізацыя якога апынулася пад пагрозай.
Асноўныя ўмовы:
- сума гранта: €1 000–5 000, у выключных выпадках да €10 000;
- заканчэнне праекта: не пазней за 31 жніўня 2027 года;
- падача заявак: на сталай аснове;
- адбор: 1–2 разы на месяц у залежнасці ад колькасці заявак;
- старт праекта: не раней чым праз 5 тыдняў пасля падачы заяўкі;
- максімальны ганарар аднаму аўтару: €4 000.
На фінансаванне да €10 000 можна прэтэндаваць у выпадку калектыўнай тэрміновай мабільнасці для пяці і больш чалавек, сумеснага праекта некалькіх аўтараў ва ўразлівым становішчы, або страты ўжо пацверджанага фінансавання падчас рэалізацыі праекта па незалежных ад аўтара прычынах.
Як падаць заяўку?
У заяўцы неабходна апісаць абставіны, у якіх апынуўся заяўнік, патлумачыць тэрміновасць падтрымкі, прадставіць план рэалізацыі праекта з тэрмінамі і бюджэтам, а таксама дакументы, якія пацвярджаюць сітуацыю. Гэта могуць быць, напрыклад, даведкі, спасылкі на публікацыі або заключэнні праваабарончых арганізацый.
Спачатку заяўкі праходзяць тэхнічную праверку і ацэнку адпаведнасці крытэрам Трэка 3, пасля чаго перадаюцца на разгляд незалежнай камісіі.
Вынікі першага года Трэка 3
За першы год працы Трэка 3 падтрымку атрымалі 36 праектаў. З іх 23 праекты ажыццяўляюцца рэпрэсаванымі дзеячамі культуры, у тым ліку 12 праектаў ад былых палітзняволеных, выдвараных з Беларусі пасля вызвалення.
Сярод аўтараў творчых праектаў па Трэку 3 — Уладзімір Някляеў, Зміцер Дашкевіч, Павел Севярынец і іншыя дзеячы беларускай культуры.
Гісторыю аднаго з падтрыманых творцаў Аляксея Сяленкі чытайце па спасылцы.
Падрабязнасці і кантакты
Падаць заяўку і азнаёміцца з поўнай дакументацыяй можна на старонцы праграмы ArtPower Belarus.
Пытанні можна дасылаць на электронную пошту: info@artpowergrants.org.
