Што такое Форум грамадзянскай супольнасці Усходняга партнёрства і якую ролю ў ім адыгрывае Беларуская Рада культуры.
15 гадоў таму Еўрапейскі Саюз запусціў ініцыятыву Усходняе партнёрства — для паглыблення супрацоўніцтва з шасцю краінамі рэгіёна: Арменіяй, Азербайджанам, Беларуссю, Грузіяй, Малдовай і Украінай. Каб забяспечыць прысутнасць голасу грамадзянскай супольнасці ў гэтых працэсах, быў створаны Форум грамадзянскай супольнасці Усходняга партнёрства.
Форум як пастаянная платформа
Першапачаткова Форум існаваў у форме штогадовых сустрэч ў Бруселі. Але дзякуючы настойлівасці беларускіх удзельнікаў і ўдзельніц, платформа набыла сталую структуру. Цяпер гэта не толькі сустрэчы, а цэлая інфраструктура з сакратарыятам у Бруселі, з прадстаўніцтвамі ад кожнай краіны і працоўнымі групамі.
Беларусь на дзяржаўным узроўні пасля 2020 года выйшла з Усходняга партнёрства, але грамадзянская супольнасць захавала ўдзел у форуме і працягвае сваю працу. Форум застаецца важнай прасторай для міжнароднай каардынацыі і прадстаўлення інтарэсаў грамадзян.
Як працуе Форум
У структуры Форуму – пяць тэматычных працоўных груп, праз якія адбываецца абмен паміж ЕС і краінамі-партнёрамі. У кожнай краіне дзейнічае Нацыянальная платформа, якая вызначае сваіх дэлегатаў і фармуе ўнутраны дыялог паміж арганізацыямі розных сектараў.
Працоўная група №4 займаецца культурай, адукацыяй і інавацыямі. Менавіта тут прадстаўлена Беларуская Рада культуры як афіцыйны дэлегат. Гэта дазваляе не толькі прадстаўляць беларускі культурніцкі сектар, але і ўплываць на фарміраванне агульнаеўрапейскай павесткі, выносіць прапановы і наладжваць міжнародныя партнёрствы.
Чаму гэта важна для культуры
Форум грамадзянскай супольнасці зарэгістраваны ў Бруселі як лабісцкая структура. Гэта дае магчымасць афіцыйна звяртацца да органаў ЕС з прапановамі і аналітычнымі дакументамі. Для культурнага сектара гэта адкрывае шлях да адвакатавання ідэй, праектаў і пазіцый: напрыклад, прасоўваць культуру як частку палітыкі бяспекі або падкрэсліваць ролю культуры ў развіцці дэмакратычнай устойлівасці рэгіёна.
Што цяпер?
Пасля 2020 года Нацплатформа Беларусі перажывае перыяд пераасэнсавання і аднаўлення. Засталося каля 50 актыўных арганізацый, якія сёння фармуюць новую супольную павестку. Гэта добры момант, каб уключацца ў працу, будаваць новыя сувязі і супольна прадстаўляць інтарэсы беларускага культурніцкага сектару на міжнародным узроўні.
Беларуская Рада культуры адкрытая да супрацы і гатовая развіваць сваю ролю ў рамках платформы: удзельнічаць у форумах, распрацоўваць ініцыятывы і прадстаўляць беларускую культуру ва Усходнім партнёрстве.
