Беларуская дэлегацыя, у якую ўвайшла і Беларуская Рада культуры, прэзентавала сваё бачанне стратэгічных напрамкаў развіцця рэгіёна ў межах Форума грамадзянскай супольнасці Усходняга партнёрства ў Вене.
У прэзентаваным дакуменце адлюстраваныя прапановы па абнаўленні мэтаў і прыярытэтаў гэтага праекту ЕС.
“На фоне гібрыднай вайны РФ, дзе інфармацыя, культура і эканоміка выкарыстоўваюцца ў якасці інструментаў уплыву, можна прапанаваць чатыры асноўныя напрамкі дзейнасці з боку ЕС у рэгіёне: пашырэнне інфраструктуры бяспекі, інвестыцыі ў рэгіянальнае культурнае і сацыяльнае развіццё, мадэрнізацыя адукацыі і развіццё субрэгіянальнага супрацоўніцтва”, – прапаноўваюць аўтары дакумента.
Дакумент знайшоў станоўчы водгук у прадстаўнікоў грамадзянскай супольнасці іншых краінаў Усходняга партнёрства і ў далейшым можа паўплываць на рашэнні еўрапейскіх структураў па фінансаванні важных для беларусаў адукацыйных і культурніцкіх праграм. У нефармальных размовах падчас Форуму прагучала меркаванне, што беларусы паказваюць астатнім добры прыклад таго, як трэба працаваць з канцэптуальнымі і стратэгічнымі дакументамі.
Усходняе партнёрства – ініцыятыва ЕС, скіраваная на паглыбленне адносін Звязу з краінамі Усходняй Еўропы, у прыватнасці з Украінай, Грузіяй, Малдовай, Арменіяй і Азербайджанам. Беларусь на афіцыйным узроўні далучылася да УП у 2009 годзе. У 2021 годзе беларуская дзяржава прыпыніла ўдзел у ініцыятыве ў сувязі з “заходнімі санкцыямі”.
