Існаванне моцнай супольнасці беларусаў — значны чыннік захавання і развіцця сучаснай беларускай культуры. Таму Беларуская Рада культуры не проста прэзентуе Стратэгію да 2027 года — мы запрашаем вас стаць яе часткай. Бо без вашага ўдзелу ніводная праграма не будзе поўнай.
У трох артыкулах мы распавядаем падрабязней пра праграмы Стратэгіі: у якім кірунку будзе працаваць Беларуская Рада культуры цягам трох гадоў, якія дзеянні мы плануем і якога выніку чакаем. І галоўнае – як кожны і кожная з вас можа паўплываць на працэсы і культурніцкую палітыку, узаемасувязі ў сферы і глабальны вынік для беларускай культуры. Тут можна даведацца больш пра Першую праграму Стратэгіі.
Другая праграма “Цэласнасць культурніцкае прасторы”
Нашая другая праграмма — пра сувязі. Мы імкнемся не толькі ствараць ці падтрымліваць цэнтры прыцягнення, але і злучаць гэтыя цэнтры рознымі “сцежкамі”.
Напрыклад, мы лабіруем стварэнне праграм мабільнасці — гэта магчымасці для творцаў павышаць сваю кваліфікацыю, наведваць прафесійныя семінары, удзельнічаць у сустрэчах на міжнародных пляцоўках альбо прэзентаваць свае творы ў іншых краінах і гарадах. Мы знаходзімся ў кантакце з нашымі партнёрамі, якія робяць такія праграмы, – каб інтэграваць беларускіх творцаў у еўрапейскае кам’юніці.
Для нас вельмі істотна даць магчымасць людзям у Беларусі далучацца да культурніцкіх працэсаў у Еўропе.
Яшчэ адна задача — даць магчымасць людзям, якія цяпер знаходзяцца ў Беларусі, карыстацца культурніцкімі прадуктамі, што ствараюцца ў замежжы. Адна справа — дасяг да відэа, з гэтым звычайна няма праблем. А калі гаворка ідзе пра кнігі, паказы спектакляў — тут трэба прыдумляць шляхі распаўсюду, бо аўдыторыя ўнутры краіны знаходзіцца пад рознымі абмежаваннямі. Умоўна, якім чынам абмінуць “экстрэмісцкі” статус нейкага твору.
Таксама нас цікавяць сувязі паміж беларускімі творцамі і іх еўрапейскімі партнёрамі — гэта і праграмы мабільнасці, і сумесныя праекты, і ўдзел у міжнародных сетках. Ёсць выдатныя прыклады ўдзелу беларускіх арганізацый у міжнародных асацыяцыях, сетках, якія маюць падобныя каштоўнасці і мэты. Гэта падвышае ўстойлівасць арганізацыі, таму што сетка ўжо лічыць беларускага ўдзельніка ці ўдзельніцу за свайго і бярэ новыя задачы ў распрацоўку. У сетках ёсць дадатковыя магчымасці, рэсурсы, абмен досведам — вельмі істотныя складнікі для развіцця беларускіх арганізацый, каб яны не толькі стваралі нешта новае, але і арыентаваліся на падобныя праекты ў еўрапейскай прасторы.
Яшчэ адзін від узаемасувязяў у культурніцкай сферы — пошук мадэляў інтэргацыі, праекты на стыку сфераў: культура і бізнес, культура і ІТ, культура і экалогія, культура і праваабарона і іншыя спалучэнні. Міжсектаральнасць дапамагае падвышаць устойлівасць кожнай галіны, сумесна выкарыстоўваць рэсурсы і ўмацоўваць адно аднаго.
Для выканання гэтых задач мы:
- Падтрымліваем праекты, што злучаюць беларускіх і замежных творцаў;
- Спрыяем наладжванню сувязяў паміж творцамі і аўдыторыяй па абодва бакі мяжы;
- Маем у фокусе ініцыятывы ў Беларусі і падтрымліваем іх;
- Ствараем праграмы мабільнасці і культурніцкага абмену;
- Дапамагаем запускаць флагманскія праекты, што спрыяюць фармаванню станоўчага вобразу Беларусі;
- Арганізуем форумы, дыскусіі, нэтўоркінг, падтрымліваем прафесійныя аб’яднанні ды інфраструктуру;
- Рэалізуем міжсектаральныя праекты і далучаем творцаў да міжнародных сетак.
Такім чынам адрасаты нашай праграмы – гэта замежныя палітычныя структуры, амбасады, МЗС, арганізатары праграмаў падтрымання, фестывалі, прафесійныя сеткі.
А партнёры – незалежныя палітычныя сілы, грамадзянскія ініцыятывы, Форум культурніцкіх арганізацый, праграма ArtPower Belarus ды іншыя.
Вынікам Другой праграмы Стратэгіі мы разлічваем бачыць жывое асяроддзе супрацы, паляпшэнне ўмоваў для творцаў у эміграцыі, інтэграцыю ў міжнародныя сеткі і інавацыйныя праекты. Гэта ўмацуе імідж Беларусі і дапаможа культурнай прасторы стабілізавацца, а беларусам и беларускам — і захаваць ідэнтычнасць.
Як далучыцца да Стратэгіі?
Для арганізацый сектара культуры
Вы — сіла, што рухае культурніцкую будучыню Беларусі. Ваша роля — ключавая, каб культурная палітыка стала неад’емнай часткай дэмакратычнай і ўстойлівай мадэлі развіцця краіны.
Запрашаем вас:
- далучацца да супольных адвакацыйных кампаній, сумесна фармуляваць пазіцыі і ствараць адвакацыйныя і праграмныя дакументы.
- браць удзел у лакальных і міжнародных форумах і канферэнцыях, уздымаць пытанне месца культуры ў грамадзянскай супольнасці, агучваць галасы і патрэбы тых, хто зараз не можа казаць гучна.
- удзельнічаць у глабальных даследаваннях і распрацоўцы дарожных мапаў;
- падтрымаць і развіваць культурніцкае лідарства.
Для арганізацый іншых сектараў (праваабарончыя арганізацыі, медыя супольнасць, бізнес, экаактывісцкія структуры, IT і інш.)
Культура — гэта не толькі пра мастацтва. Гэта пра каштоўнасці, бачанне, супольнасць і інавацыі.
Ваша роля важная для таго, каб інтэграваць культурнае вымярэнне ў шырокі кантэкст пераменаў у Беларусі.
Мы шукаем партнёраў для міжсектаральнага ўзаемадзеяння:
- культура і праваабарона — абарона культурных правоў і свабоды творчасці;
- культура і медыя — супольнае пашырэнне культурнага кантэнту і візуалізацыя пераменаў;
- культура і экалогія — устойлівае планаванне і экалагічны актывізм праз мастацтва;
- культура і бізнес/IT — супольнае стварэнне прадуктаў, платформаў, адукацыйных і грамадскіх ініцыятыў.
Мы адкрытыя да ўдзелу ў сумесных заяўках на еўрапейскія праграмы і праекты.
Разам мы можам уплываць на палітыку, змяняць асяроддзе і будаваць будучыню.
Прафесійныя асацыяцыі, сеткі і галіновыя аб’яднанні,
Вы — аснова інстытуцыйнага ландшафту беларускай культуры і ключ да яе доўгатэрміновай устойлівасці. Вашая праца аб’ядноўвае творцаў і арганізацыі па абодва бакі мяжы, фармуе прафесійныя супольнасці і забяспечвае пераемнасць ведаў і стандарт высокай якасці ў сферы. Вы ствараеце сувязі паміж практыкамі, падтрымліваеце галіновую ідэнтычнасць і развіваеце супольную мову культуры.
Мы запрашаем вас далучацца да праграмы «Цэласнасць культурніцкае прасторы». Разам мы можам мапаваць патрэбы сферы, распрацоўваць стратэгічныя кірункі развіцця і ўмацоўваць сувязі паміж беларускімі ініцыятывамі ўнутры краіны і за яе межамі.
Мы гатовыя падтрымліваць супольныя праекты, у тым ліку трансгранічныя, ствараць пляцоўкі для галіновага дыялогу, арганізоўваць адукацыйныя ініцыятывы, супольна лабіяваць патрэбы сферы на міжнародным узроўні і праз міжсектаральнае супрацоўніцтва. Дзякуючы сумесным дзеянням мы зможам павысіць бачнасць беларускай культуры і ўплывовасць творчых супольнасцяў у знешнепалітычным, экспертным і донарскім полі.
Культурніцкія хабы і прасторы,
Вы — жывыя цэнтры супольнасці, прасторы даверу і натхнення, дзе нараджаюцца сэнсы і ствараюцца сувязі. У сённяшніх умовах вы адыгрываеце незаменную ролю — захоўваеце кантакт паміж творцамі, гуртуеце людзей вакол культурніцкіх ініцыятыў, падтрымліваеце жыццё супольнасці ўнутры краіны і ў дыяспары. Мы бачым вас як цэнтры, здольныя не толькі выконваць сваю працу лакальна, але і станавіцца каардынацыйнымі вузламі для ўсёй сферы.
Запрашаем вас далучацца да партнёрства ў межах праграмы «Цэласнасць культурніцкае прасторы». Разам мы можам арганізоўваць супольныя сустрэчы, дыскусіі і адукацыйныя мерапрыемствы. Мы гатовыя разам распрацоўваць інструменты для падтрымкі ўзаемадзеяння паміж хабамі, падтрымліваць мабільнасць, дапамагаць вызначаць і ўмацоўваць вашую ролю ў агульнай інфраструктуры.
Будзем радыя вашым прапановам і запытам на пошту info@byculture.org.
Мы адкрытыя да партнёрства. Разам мы зможам больш!
